屯門Café Heato（海圖）

資料來源：壹週刊 | 2015-06-04

街坊撐我開Cafe

陳海源（Amen），二十六歲，屯門Café Heato（海圖）咖啡店老闆，成功開鋪全因面皮厚，周街同人講自己唔想打死一世工，有個café夢，打動送石油氣伯伯和做清潔嬸嬸入股，還有一眾網民支持。

我間café叫海圖，即係海中地圖，喺大海追夢。英文名Heato係攞個諧音，點知啲客拎嚟講笑，話倒轉就係「To hea」。開張後的確有唔少人嚟hea，枱枱客都起碼坐幾粒鐘，有啲仲坐成日，但我唔介意，因為夢想，係喺咖啡之中慢慢嗒出嚟。

我哋新世代，個個都講緊追夢，咪以為我係富家子弟呀。我喺大陸出世、阿爸喺澳門打工，長時間見唔到佢、自己有讀寫障礙，細個好自卑成日發阿媽脾氣。我喺屯門屋邨中學中五畢業之後，試過打散工搵幾千蚊一個月。望住阿媽幾十歲人仲打三份洗碗工養起頭家，我覺得再頹落去唔係辦法，捱咗幾年終於疊埋心水，將儲儲埋埋嗰幾萬蚊俾阿媽，自己帶住八百蚊港幣，膽粗粗飛去澳洲工作假期，想喺一個陌生環境，諗吓將來條路點行。

初初去到布里斯本，喺表哥間清潔公司做嘢，第一個月厚住面皮問佢借糧租屋，剩低啲錢就只夠買一條麵包、一樽果醬，我食足一個月。有日阿媽打電話嚟，我嫌煩cut佢線，後來先知原來佢想同我講生日快樂，我之後係咁喊，下定決心唔再令阿媽失望，開鋪嘅夢想，就係咁嚟。

點解想開café？喺澳洲打工三年，朝朝四點幾起身洗廁所，要提神就梗係飲咖啡，當時一句英文都唔識講，見到鬼佬叫cappuccino就跟住買，慢慢就鍾意咗。返嚟香港，我入連鎖店學沖咖啡。我同自己講，要兌現細細個嘅承諾養起頭家，就唔可以打死一世工，一定要做老闆，終於死慳死抵儲咗十萬蚊，但都唔夠錢開鋪，無計，惟有出最後一招：面懵懵，靠把口。

咖啡餘香

我朝朝落屋企樓下公園，見到街坊唔理識唔識，都走埋去同佢哋講點解咁想開café、間鋪想點設計、點沖咖啡，當然有人覺得我黐線，又以為我呃錢，但好快中學同學David就話有興趣夾五萬蚊，仲話我沖咖啡佢負責煮嘢食。最估唔到係，有一個送石油氣嘅伯伯、一個做清潔嘅嬸嬸，佢哋喺大牌檔聽到我想開台式悠閒咖啡店，但頂級咖啡機要六、七萬蚊一部，仲要買非洲和牙買加最靚咖啡豆。佢哋聽完我全盤諗法，唔聲唔聲總共夾咗四十萬俾我，仲同我講：「我好耐冇見過有後生仔，咁有計劃去做好件事，筆錢當我哋入股，唔使急住還！」夢想成真，真係唔可以唔多謝兩位貴人。好多人話我好彩，但其實一二年六月開鋪第一日得二百蚊生意咋。於是我堅持每日寫一篇blog，影低啲咖啡相，再擺上網分享創業故事，慢慢開始有網友識得摸上門，依家我每日平均賺到千幾蚊，算係咁啦。嚟敲門嘅，仲有我七個員工 ，佢哋初初係我嘅客人，覺得打工好迷失，我就話：「不如入廚房試吓沖咖啡？」就係咁佢哋唔收人工留低，到今日上晒手，有個女仔仲租咗隔籬間鋪開café，我怕唔怕教識徒弟無師傅？傻啦，佢做老闆我高興都嚟唔切。